Hikayat Gampong

Masyarakat Bluka Teubai Tengah Mendaratkan Bot Ikan yang Baru Menepi

Foto@Syukri Isa Bluka Teubai

Hikayat Gampong

Poe Tuleh; Syukri Isa Bluka Teubai

Na keuh gampong long Bluka Teubai

na njang peugah gampong nyan hai that ceudah

senang that hate long meuleumpah

meuseubab gampong long rame njang sanjong hai Tgk Ampon

Eee rakan neudengeu keuh bacut long calitra

dak galom troeh keunan neuteuka

nak mangat neuteuhoe punca

Ureng lam gampong makmue meu lempah

raseuki meuruah ruah asai ta tem mita

seunang that hate ban bungong keumang

‘oh wate long keunang ke tempat asai nyan

Mandum ureng lam gampong geukerija

na njang peuget batee bata

na njang meulaot

na njang meuneuhen

Njang penteng haleu meu rasa lam tuboeh

na njang meukat

na njang ceumecoeb geupegeut tah

merek merek indah geukirem u Banda

njang meukat teuma seugala rempah rempah

bu geukulah di ateuh meja teu atoe meubanja

so njang hana peng jet meuutang

dengen syarat baye rijang keumodai usaha

So njang galoem na peng meutanggoh dilee

ate troeh beulen lhe geubayee sigra

teuma that meutuah ureng njang meukat

ata awai galoem glah jet meuutang teuma

Ureng meu laot pih saboeh lagee

so so njang troeh engket geubagi asai le raseuki

pajoeh sige glah njang ka bak babah alhamdulillah hantom geulupa

njan keuh meunan geutanyoe manusia

Seunang ngen hana Allah bak babah meubek teuh tuwee

b’oh kakeuh meunan ureng meu laot nyan ‘oh noe ta peugah

Tasambong kisah keu ureng meubata

ban suboh beukah ka u dalam sal

geu pe ‘ek tanoh u ateuh meja

nak mangat ji olah keu aneuk bata

‘Oh lheh njan teuma tanoh geucatoek

lage moto kroek tanoh geupeurata

dengen ie geusiram nak mangat geu peu lheu

njang keuh but di ureng meu bata si umue masa njan ban keurija

Di ureng meuneuhen pih saboeh macam

gadoeh geupuplung puplung parang ‘oh malam teuka

geupeyee pancuri

geu peyee murua sebab awak nyan dua saban keurija

Njang keuh menoe gampong njang ceudah

mandum njang tinggai inan seunang lagoina

asai bek be e bak mita raseuki

han apoeh apah geutanyoe lam donya

Nyoe keuh Bluka Teubai

gampong njang ceudah dengen sijahtra

beu neubri le Allah hudep bahgia

keu ban bandum ureng gampong nyan

ngen ban bandum ureng njang hudep lam donya.

‘Oh noe keuh ka akhe calitra

so njang galom meupat punca

keunan u gampong Bluka Teubai nyan

keunan laju neuteuka.

Bluka Teubai, 20 November 2009.

Syukri Isa Bluka Teubai, Penyuka Sastra.