Haba Keu Pertee Aceh
Poe Tuleeh; Syukri Isa Bluka Teubai
Seugalom long mulayi tuleeh bacut beurakah inoe, teulebeh that, long lakee me’ah njang lambong nibak ureng ureng droe neuh njang na lam Pertee Aceh. Kerana long sadar dengen brat that that sadar bahawa hana urusan long inan, seucara umum. Tapi menyoe seucara pribadi jeulaih long na urusan lam hai nyoe, meuwab long sidroe Aneuk Aceh. Na tanggong jaweub kamoe njang muda muda nyoe, singeh uroe di ateuh tanoh Aceh nyoe.
Nakeuh, dari beuklam ka dengen uroe nyoe ka meubee bee beurita njang bahawa peutua DPRA ka neunek gantoe. Jet, pakeun hanjet meugantoe, tapi mandum geutanyoe ka tateupu, nakeuh, padub bulen tek ukee akan na peumilihan raya. Lam hai nyoe Pertee Aceh ka dengen seugenap rakyat haruih meusaboh untuk cok su mutlak nibak masyarakat supaya nak jet meuatoe kelayi lam parlemen, nak jet mat keumudoe lom nibak ge nyoe.
Tapi, uroe nyoe, pu ka teujadi, pu ka njang teujadi lom uroe nyoe? Menyoe tapeugah keu neutepu pastilah ureng droe neuh leubeh leubeh neutepu, apabila sipu pu but ka kachoe apalagi padub uroe tek ka peumilihan caloen dewan baroe, hana pu taneuk harap akan le meutume su nibak rakyat, hana pu harap untuk peuget keurija njang jroeh, hana pu harap untuk atoe langkah, hana pu harap keu ata nyan man mandum, han akan neutumee atoe, meuwab kabeh teunaga badan ka dengen teunaga pikiran untuk uroeh masalah njang ken masalah.
Abeuh teunaga pikiran, abeuh teunaga badan bak uroeh uroeh geunantoe peutua DPRA, peumilu nakeuh ka dike mata. Digob laen jiatoe aju aju cara keurija, digob laen jikeurija aju aju njang jet jet jikeurija. Ureng droe neuh meusibok teuk bak but njang seubetoi jih ken but, teuh ken but, kerana njang perle that jinoe kiban neu peuget cara nak le su meuhingga lam parlemen nak meutume mat lom keumudoe. Bek sampee jijak mat le gop.
Neu beh bejioh jioh ile ego untuk meupakee sabee kedroe droe, neubeh ile beujioh jioh, lheh peumilu entek nyan hom neuh, hai menyoe tapeugah njang seubetoi jih, sabee keudroe droe sit hanjet na pakee, beda beda cara seumikee nyan hai biasa. Paken neupiyoh dawa ile siat sabee keudroe droe kerana na hai laen njang leubeh penteng untuk neupikee, na hai laen njang saban saban neuh haruih neupikee untuk sa’ah nyoe, jeh peumilu ka dike mata.
Lom pih, gob nyan njang teungeh meujabat jinoe lahee tateupu, lahee neutepu, ken galom na keusalahan njang mustahak that njang ka geupelaku? Ken galom na keusalahan gob nyan njang mustahak that that meuhingga haruih gantoe lam siklep siklap aju, eee meuwap bak proyek, nyan hai laen. Lom pih kadang sit na geujok ka meupadub boh neuh sapoe ka, dan ken han mungken geujok keu ureng set set sabee, teuh sit hak ureng laen menyoe gadoh geujok keu ureng set set sabee sabee.
Lom pih inoe njang perle that long keunek peugah nakeuh ken bhah proyek, tapi njang perle that jinoe, bek neubeh beh teunaga pikiran, bek neubeh beh teunaga badan untuk meudawa sabee sabee droe. Na neusadari bahawa gop laen tengeh jigroup group lambong bak jikhem, jikhem keu ureng droe neuh, dan lam hai dawa ureng droe neuh nyan jinoe beunetepu, nakeuh, ureng peukachoe ie, dan nyan salah saboeh cara musoh untuk jipeureleh ureng droe neuh.
Beu neu ingat dua uroe tek nyoe ka peumilu, neukubah ile ego meudawa sabee keudroe droe, neu utamakan ile njang utama, nakeuh rakyat perle neupeutimang dan musoh nyang perlee talawan. Taharap sabee Pertee Aceh nyoe beusabee lam lindong Poe, ureng ureng nyang seumike keu rakyat beusabee sabee sit lam lindong Poe, meubek teupeh jaroe aki, beutroh lagee njang meuhajat, beutroh lagee lam seunurat.
Seumoga geutanyoe man mandum beutepuka hate, beudeh jalan pikiran njang get untuk Aceh nyoe. Beuta tuso so musoh teuh, beuta tuso so syara teuh. Bahawa le that hai laen manteng njang perle pikee. Neu ingat keu Aceh, neu ingat keu pertee neuh, Pertee Aceh, neu ingat kiban hek neuh bak neupeget dilee meuhingga ka lagee nyoe rupa, neu ingat keu Aneuk Yatim, neu ingat keu ureng ureng ineng njang ka Janda, neu ingat keu ngen ngen neuh nyang ka jeut keu Syuahada, neu ingat keu Bansa, neu ingat keuh keu Allah Ta’ala!
Syukri Isa Bluka Teubai, penyuka sastra.
0 Comments